Atli Steinn Guðmundsson
„Þetta var svolítið viðburðaríkur dagur í gær þegar hrinur gengu yfir undan Reykjanestá og í Kötluöskjunni,“ segir Páll Einarsson, jarðeðlisfræðingur og prófessor emeritus, í samtali við mbl.is um undangengnar jarðhræringar.
Segir hann téð svæði bæði undir smásjá þessa dagana. „Þetta er framhald atburðarásar sem staðið hefur lengi á báðum þessum stöðum, sérstaklega í Kötlu sem hefur sýnt lífsmörk alveg síðan mælingar hófust eiginlega,“ heldur Páll áfram.
Vill hann þó forðast í lengstu lög það orðalag að Katla sé komin á tíma eins og stundum hefur verið haft á orði, „þessar eldstöðvar hafa ekki hugmynd um tíma, þær haga sér allar mjög óreglulega. Þess vegna leggjum við áherslu á að fylgjast með og gera mælingar, finna út hvert ástand eldstöðvanna er,“ segir Páll.
Aðspurður kveður hann ástandið um þessar mundir óvenjulegt að því leyti að nú séu margar eldstöðvar komnar á það stig að geta gosið hvenær sem er.
„Þar eru fremstar í flokki Grímsvötn, Bárðarbunga og Hekla en Katla hefur sýnt það mikil lífsmörk í langan tíma að það er ekki ólíklegt að hún verði að teljast í þessum hópi líka,“ segir Páll og bendir á að nú hafi Reykjanesskagi einnig bæst í hópinn nýlega.
„Þetta eru allt saman eldstöðvar sem þarf að fylgjast með og í hvert sinn sem kemur skjálftahrina af þessu tagi, margir litlir skjálftar á stuttum tíma, þá er best að hafa augun hjá sér. Þetta fylgir því að búa í svona landi, að fylgjast vel með og láta ekki hlutina koma aftan að sér alltaf,“ segir Páll Einarsson jarðeðlisfræðingur að lokum.