Innlent | mbl | 19.3.2024 | 13:25

Efast um að hann fái það fé sem hann vill

Sigurður Ingi Jóhannsson, innviðaráðherra. Eyþór Árnason

Sigurður Ingi Jóhannsson segir gríðarlega áskorun felast í uppsöfnuðu viðhaldi á vegakerfinu, sem Samtök iðnaðarins og Félag ráðgjafarverkfræðinga meta á 110 milljarða króna.

Sigurður Ingi telur skilning á málinu í ríkisstjórn en segir: „Hvort ég fái alla þá fjármuni sem ég myndi vilja, það efast ég um.“

Fjallað var ítarlega um þennan uppsafnaða vanda í Morgunblaðinu á fimmtudaginn. Kom þar fram að á þessu ári væru veittir 12,8 milljarðar í viðhald vega. Upphæðin þyrfti hið minnsta að vera 17-18 milljarðar til að halda í horfinu og meira til að vinna á skuldinni.

Frétt af mbl.is

Tugmilljarða skuld í viðhaldinu

Vandinn nær tvöfaldast á tveimur árum

Athygli vekur að Vegagerðin taldi árið 2020 uppsafnaðan vanda nema 60-65 milljörðum og því ljóst að sú tala hefur hækkað umtalsvert á stuttum tíma. Sigurði Inga segir við mbl.is að á síðustu 7 árum hafi þó fjármagn til viðhaldsverið aukið mikið.

„Þetta er gríðarleg áskorun. Frá því að ég kom inn í innviðaráðuneytið hef ég hækkað meira en 100% fjármagn til viðhalds, úr 5,5 milljörðum, sem það var árið 2017, yfir í nær 13 milljarða.“

Frétt af mbl.is

Ástand vega í Dölum slæmt

Viðhald hafi verið vanrækt í of langan tíma

Sigurður Ingi segir að áhersla hafi verið lögð á viðhald vega bæði í fjármálaáætluninni í fyrra og aftur á þessu ári og eins í samgönguáætlun.

Hann segir að Vegagerðin hafi komið fram með hugmyndir um að 18 milljarða þurfi nú í viðhaldsframkvæmdir og leggi hann slíkt fram.

Frétt af mbl.is

Hefðu þurft 4 til 5 milljarða í viðbót

Viðhaldi vega hafi ekki verið sinnt í allt of langan tíma. „Hitt er svo það að margir innviða okkar eru að sæta miklu meira álagi en var áður, ég nefni sem dæmi, að það var 19% aukning umferðar á Suðurlandsvegi á milli febrúar 2023 og febrúar 2024,“ segir ráðherrann.