Þessi fimm hafa náð lágmarkinu
Setja bókamerki
Að minnsta kosti fimm frambjóðendur til embættis forseta Íslands hafa náð lágmarksfjölda meðmæla sem þarf til að vera kjörgengur. 62 einstaklingar eru nú að safna meðmælum til að verða kjörgengir.
Ástríður Jóhannesdóttir, framkvæmdarstjóri Landskjörstjórnar, segir í samtali við mbl.is að sér að vitandi þá hafi aldrei áður verið jafn mikill fjöldi fólks sem hafi safnað meðmælum fyrir forsetakosningar og nú í ár.
Hún segir þó erfitt að vita það fyrir víst þar sem fólk safnaði áður meðmælum aðeins á pappír.
Lágmark að fá 1.500 meðmæli
Frambjóðendur vinna nú að því að safna meðmælum til að vera kjörgengir. Að lágmarki þarf hver frambjóðandi 1.500 undirskriftir og að mestu 3.000 undirskriftir.
Samkvæmt svörum frambjóðenda við fyrirspurn mbl.is þá eru þetta þeir frambjóðendur sem hafa safnað að lágmarki 1.500 undirskriftum.
- Arnar Þór Jónsson
- Ástþór Magnússon
- Baldur Þórhallsson
- Halla Tómasdóttir
- Jón Gnarr
Þegar hafa 62 einstaklingar stigið fram og boðið sig fram til forseta. Meðal þeirra eru:
- Baldur Þórhallsson stjórnmálafræðiprófessor
- Halla Tómasdóttir frumkvöðull
- Arnar Þór Jónsson lögmaður
- Jón Gnarr, skemmtikraftur og fyrrverandi borgarstjóri
- Ástþór Magnússon, bílasali og friðarsinni
- Ásdís Rán Gunnarsdóttir athafnakona
- Helga Þórisdóttir, forstjóri Persónuverndar
- Sigríður Hrund Pétursdóttir, fjárfestir og fyrrverandi formaður FKA
- Guðmundur Felix Grétarsson
- Guðni Þór Þrándarson
Ef allir 62 frambjóðendur, margir af hverjum sem hafa ekki einu sinni tilkynnt um framboð sín, myndu fá 1.500 meðmæli þá þýðir það að 93 þúsund kosningabærra manna þyrftu að mæla með einhverjum.
Ef aðeins er litið á þá sem hafa sérstaklega tilkynnt um framboð sín þá eru það um 10 manns. Það þýðir að í það minnsta 15.000 kosningabærra manna þyrftu að mæla með frambjóðanda.
Nokkrir sem liggja enn undir felldi
Línurnar skýrast meira með hverjum deginum sem líður en þó eru enn þá stór nöfn á hliðarlínunni sem hafa verið orðuð við embættið og liggja undir felldi.
Katrín Jakobsdóttir forsætisráðherra hefur ekki tekið afstöðu til framboðs en framámenn innan Vinstri grænna segja hana íhuga málið alvarlega um þessar mundir.
Halla Hrund Logadóttir, orkumálastjóri, sagði í samtali við mbl.is í síðustu viku að hún myndi greina frá ákvörðun sinni fljótlega eftir páska og svo kveðst Jakob Frímann, þingmaður Flokks fólksins, liggja undir feldi og íhuga mögulegt framboð.
Kosið 1. júní
Guðni forseti hefur þá sjálfur, í svari við fyrirspurn Morgunblaðsins, viðurkennt að honum berist stöðugar hvatningar og áskoranir um að endurskoða ákvörðun sína um að láta af embætti í sumar.
Kosið verður til embættis forseta Íslands 1. júní 2024.
Þann 26. apríl rennur framboðsfrestur út og 2. maí mun landskjörstjórn auglýsa hverjir eru í framboði til forseta. Eftir það verður hægt að kjósa utan kjörfundar m.a. hjá sýslumönnum og erlendis í sendiráðum og hjá ræðismönnum Íslands.
„Þakklátur að hanga í toppsætunum“
„Mjög ánægður með útkomuna“
Níu milljónir í auglýsingar til erlendra miðla
11 verða í framboði til embættis forseta Íslands
Umdeild einkennismerki lögreglunnar
Eru að vakta stöðuna í bólusetningum barna
„Eigum eftir að sjá miklar sviptingar“