Þingmenn stjórnarandstöðunnar gerðu niðurstöðu Mannréttindadómstóls Evrópu (MDE) að umræðuefni sínu við upphaf þingfundar í dag undir liðnum „fundarstjórn forseta“.
Kallað var eftir kosningum og breytingu á stjórnarskrá Íslands til að bregðast við niðurstöðu dómstólsins.
Birgir Ármannsson, forseti Alþingis, hefur óskað eftir því að skrifstofa Alþingis framkvæmi greiningu á niðurstöðu dómstólsins og verður sú niðurstaða kynnt þingmönnum þegar hún liggur fyrir. Þetta sagði Birgir á þinginu nú fyrir skömmu.
Var íslenska ríkið dæmt brotlegt gegn rétti borgara til frjálsra kosninga sem og gegn meginreglu um skilvirk réttarúrræði í kosningunum til Alþingis árið 2021. Að mati Mannréttindadómstólsins gátu þingmenn ekki verið „pólitískt hlutlausir“ í ákvörðunartöku um kosninguna.
Halldóra Mogensen, þingmaður Pírata, sagði að niðurstaðan hlyti að kalla á endurskoðun á stjórnarskránni.
„Svo þætti mér fullkomlega eðlilegt að varpa því fram þegar við erum að tala um ábyrgðina og hverjar eru pólitískar afleiðingar af þessu, þá hljótum við að spyrja okkur hvort það sé ekki eðlilegt að við boðum hreinlega til kosninga.“
Þórunn Sveinbjarnardóttir, þingmaður Samfylkingarinnar, sagði í ræðu sinni að hún hygðist taka upp þetta mál í stjórnskipunar- og eftirlitsnefnd á morgun.
Hvatti hún þingheim til að breyta lögum „sem nauðsynlegt er að breyta og breyta ákvæðum stjórnarskrár“.
Hildur Sverrisdóttir, þingmaður Sjálfstæðisflokksins, kvaðst taka undir margt af því sem aðrir þingmenn höfðu sagt.
Hún sagði það vera sjálfsagða skyldu þingheims að ræða þá anga fyrirkomulags kosninga á Íslandi sem MDE gagnrýndi. Þó vildi hún minna á, eins og fram kom í niðurstöðu MDE, að störf kjörbréfanefndar hefðu verið unnin af heilindum.
Hanna Katrín Friðriksson, þingmaður Viðreisnar, sagði niðurstöðu dómstólsins vera áfellisdóm á því hvernig framkvæmd kosninga væri háttað hér á landi. Hún sagði mikilvægt að geta tekið umræðu um þetta mál og ætti sú umræða að vera hafin yfir pólitíska flokkadrætti.