Kjartan endaði í þriðja sæti í Suðurkjördæmi

Árni M. Mathiesen, fjármálaráðherra, Árni Johnsen, fyrrverandi alþingismaður og Kjartan Ólafsson, alþingismaður, voru í þremur efstu sætunum í prófkjöri Sjálfstæðisflokksins í Suðurkjördæmi í gær, en talningu lauk í morgun. Í fjórða sæti var Björk Guðjónsdóttir, bæjarfulltrúi en þrír núverandi alþingismenn flokksins enduðu neðar. Flokkurinn fékk þrjá þingmenn í kjördæminu í síðustu kosningum.

Alls voru greidd 5814 í prófkjörinu og þar af voru 5461 gild. Árni M. Mathiesen fékk 2659 atkvæði í 1. sætið eða 48,7% af gildum atkvæðum. Árni Johnsen fékk 2302 atkvæði í 1.-2. sætið og Kjartan Ólafsson 1578 í 1.-3. sætið. Björk Guðjónsdóttir fékk 2112 í 1.-4. sætið, Unnur Brá Konráðsdóttir, sveitarstjóri, fékk 2592 í 1.-5. sæti og Drífa Hjartardóttir, alþingismaður, 2965 atkvæði í 1.-6. sætið.

Í næstu sætum voru Guðjón Hjörleifsson, alþingismaður, Grímur Gíslason, framkvæmdastjóri, Helga Þorbergsdóttir, hjúkrunarforstjóri, Gunnar Örlygsson, alþingismaður, Kristján L. Pálsson, fyrrverandi alþingismaður, Birgitta Jónsdóttir Klasen, náttúrulæknir og Kári Á. Sölmundarson, sölustjóri.

• 4 blogg um fréttina

Bloggað um fréttina

• Sigmar Guðmundsson: Hrútalykt í suðri
• G. Tómas Gunnarsson: Af prófkjörum
• Magnús Helgi Björgvinsson: Sjálfstæðisfólk á Suðurlandi hafna tengslum við landbúnað
• Stefán Friðrik Stefánsson: Sigur Árnanna í Suðrinu - þrír þingmenn falla