Sigurbjörg Sigurgeirsdóttir, stjórnsýslufræðingur býður sig fram í 5.-7. sætið fyrir Samfylkinguna í Reykjavík. Sigurbjörg hefur m.a. látið heilbrigðismál til sín taka.
Sigurbjörg segist í tilkynningu bjóða fram þekkingu sína, reynslu og tíma til að vinna í umboði kjósenda að því að koma þjóðinni í gegnum þetta erfiða tímabil. Þar hyggist hún leggja höfuðáherslu á endurreisn efnahags- og atvinnulífsins, hvernig viðhalda megi norrænu heilbrigðiskerfi á Íslandi þrátt fyrir nokkurra ára fyrirsjáanlega niðurskurð og gagngerar stjórnsýslulegar umbætur á Íslandi.
Sigurbjörg er með meistaragráðu og doktorsgráðu í stjórnsýslufræðum frá London School of Economics (LSE),og lauk námi í heilsuhagfræði við HÍ og félagsráðgjöf í Osló 1979. Hún starfaði sem félagsráðgjafi á ýmsum sviðum félags- og heilbrigðisþjónustu og var yfirmaður öldrunarþjónustu hjá Reykjavíkurborg. Sigurbjörg hefur stundað rannsóknir og kennslu í stjórnsýslufræðum við LSE, og starfað sem sérfræðilegur ráðgjafi í stefnumótun fyrir Alþjóðabankann í Washington og breska menntamálaráðuneytið. Í síðustu ríkisstjórn var hún stjórnsýsluráðgjafi fyrir utanríkisráðherra og heilbrigðisráðherra.
Sigurbjörg
er fædd 1955 á Litlu Fellsöxl í Skilmannahreppi en hefur lengst af búið í
Reykjavík. Hún var gift Sigursteini
Gunnarssyni tannlækni sem lést í Reykjavík 1997. Frá 1998 til 2007 var hún við nám og störf í
London. Unnusti hennar er Robert Hunter
Wade prófessor í stjórnmálahagfræði við London School of Economics.