Innlent | Kosningar | mbl | 4.4.2009 | 11:19

Yfirgjammari þingsins

Lúðvík Bergvinsson og Arnbjörg Sveinsdóttir tókust á í þingsal í morgun.

„Formaður þingflokks Sjálfstæðisflokksins er orðinn nokkurs konar yfirgjammari þingsins,“ sagði Lúðvík Bergvinsson, formaður þingflokks Samfylkingarinnar úr ræðustóli á Alþingi. Verið var að ræða fundarstjórn forseta og kom til snarpra orðaskipta milli stjórnar og stjórnarandstöðu.

Umræður um fundarstjórn forseta tóku rúman hálftíma í upphafi þingfundar í morgun, líkt og marga undanfarna daga.

Arnbjörg Sveinsdóttir, þingflokksformaður Sjálfstæðisflokks, kallaði ítrekað úr sæti sínu þegar Lúðvík Bergvinsson blandaði sér í umræðurnar og fór að lokum svo að hann kallaði Arnbjörgu yfirgjammara þingsins. Lúðvík fór fram á það við forseta að reynt yrði að hafa hemil á þingflokksformanni Sjálfstæðisflokksins.