Reuters

Stjórn Bretlands íhugar að koma upp risastórum gagnagrunni til að fylgjast með skilaboðum milli milljóna manna á samskiptavefjum á borð við Facebook, að sögn breskra fjölmiðla. Gagnagrunnurinn á að vera þáttur í baráttunni gegn hryðjuverkastarfsemi í heiminum.

Fréttavefur breska blaðsins The Times segir að ráðherrar í bresku stjórninni hafi skýrt frá því að til greina komi að nota gagnagrunninn til að fylgjast með skilaboðum milli fólks á Facebook, MySpace og fleiri samskiptavefjum. Áður hafði verið skýrt frá því að gagnagrunnurinn yrði notaður til að geyma upplýsingar um símtöl, tölvupósta og netnotkun í Bretlandi til að afstýra hryðjuverkum. Slíkur gagnagrunnur hefur verið ráðgerður í samræmi við tilskipun frá Evrópusambandinu eftir mannskæð hryðjuverk í London í júlí 2005. Síðan þá hefur notkun á samskiptavefjunum stóraukst, en talið er að um helmingur Breta noti vefina. Tilskipun ESB nær ekki til samskiptavefjanna og bresk öryggisyfirvöld óttast að þetta reynist smuga sem hryðjuverkamenn og glæpamenn geti fært sér í nyt.

Ráðherrarnir segja að skilaboðin sjálf verði ekki geymd, heldur verði aðeins fylgst með því við hverja notendur vefjanna skiptist á skilaboðum.

Breskir stjórnarandstöðuflokkar, mannréttindahreyfingar og sérfræðingar í öryggismálum hafa mótmælt áformunum, segja stjórnvöld ganga allt of langt í eftirliti með samskiptum fólks, auk þess sem áformin séu svo umfangsmikil að þau verði óframkvæmanleg.