Telja ónæmiskerfi kvenna sterkara en karla

Niðurstöður nýrrar rannsóknar benda til þess að ónæmiskerfi kvenna sé sterkara heldur en karlmanna. Nú hafa karlmenn afsökun, og geta vísað í vísindalegar niðurstöður máli sínu til stuðnings, þegar þeir kvarta undan óþægindum og slappleika vegna kvefs og hósta.

Fram kemur á vef breska ríkisútvarpsins að rannsóknin bendi til þess að kvenhormónið estrógen styrki ónæmiskerfi kvenna í baráttunni við sýkingar.

Svo virðist sem að estrógen berjist gegn ensímum sem hindra bólgumyndun, en hún ver líkamann gegn sýkingum.

Rannsóknin, sem vísindamenn við McGill háskólann í Kanada gerðu, hefur verið birt í Proceedings of the National Academy of Sciences.

Á vef BBC kemur fram að vísindamennirnir hafi einblínt á ensím sem kallast Caspase-12. Vitað er að það dregur úr bólgumyndun, sem er fyrsta vörn líkamans gegn bakteríu- og veirusýkingum. 

Vísindamennirnir rannsökuðu mýs sem voru ekki með Caspase-12 genið. Þær áttu því auðvelt með að verjast sýkingum.

Genið var síðan sprautað í mýsnar, þ.e. bæði kyn. Niðurstaðan var sú að aðeins karldýrin áttu í meiri hættu á að fá sýkingar. 

Vísindamennirnir drógu því þá ályktun að estrógenið í kvendýrunum hafi komið í veg fyrir að Caspase-12 genið hefði nokkur áhrif.

• 1 blogg um fréttina

Bloggað um fréttina

• Arnar Pálsson: Estrogen viðtakinn