Lengi hefur verið ljóst að netmiðlar hafa tekið lesendur frá prentuðum dagblöðum en nú eru vísbendingar um að slíkt hið sama sé að gerast með áhorfendur sjónvarpsfrétta.
Í nýrri bandarískri könnun kom í ljós að aðeins þriðjungur fólks á aldrinum 18-29 ára sagðist hafa horft á sjónvarpsfréttir daginn áður. Árið 2006 sagðist helmingur fólks á þessum aldri hafa horft á sjónvarpsfréttir.
Bandaríska Pew-rannsóknarstofnunin segir að í könnuninni hafi 19% aðspurðra sagst fá fréttir af samfélagsvefjum. Árið 2006 var hlutfallið aðeins 9%.
Pew segir að árið 1991 hafi 56% fólks lesið dagblað daginn áður en könnunin var gerð. Í ár er hlutfallið 29%. Hins vegar segjast nú 39% fara á netmiðla til að nálgast fréttir, að því er fram kemur í frétt AP-fréttastofunnar.