Dregur úr drykkju þungaðra kvenna

Þungaðar konur drekka minna áfengi en áður en illa gengur að fá konur sem neyta of mikils áfengis til þess að hætta drykkju á meðgöngu. Þetta er niðurstaða nýrrar ástralskrar rannsóknar.

Rannsóknin var gerð meðal 2.700 kvenna sem búsettar eru í New South Wales og Queensland. Stóð rannsóknin yfir í fimm ár en niðurstaðan er birt í Medical Journal of Australia.

Þar kemur fram áfengisneysla kvenna á meðgöngu dregst saman jafnt og þétt á tímabilinu sem um ræðir, 2007-2011. Árið 2007 neyttu 52,8% kvenna áfengis á meðgöngu á meðan hlutfallið var komið niður í 34,8% árið 2011. 

Þegar konur eru komnar yfir fyrsta hluta meðgöngunnar er fátítt að þær neyti áfengis árið 2011 eða 25,8% samanborið við 42,2% árið 2007. Eins hefur sá hópur kvenna sem neytir áfengis alla meðgönguna minnkað úr 20,9% í 11%.

Aftur á móti virðast drykkjuvenjur kvenna sem neyta mikils áfengis ekki breytast á tímabilinu, þær drekka enn jafn mikið og áður.

• Blogga um frétt