Hætta á árekstri jarðar við loftstein

Nýlega fór framhjá jörðinni einn hættulegasti loftsteinn sem um getur. Sá hinn sami mun snúa aftur árið 2032 og vilja úkraínskir vísindamenn meina að þá sé hætta á að steinninn skelli á jörðinni. NASA telur líkur á því mjög litlar.

Úkraínsku vísindamennirnir segja að steinninn sem fór fram hjá jörðinni í september sé einn sá hættulegasti sem fyrirfinnist. Hann muni koma aftur að jörðinni innan 20 ára. Þá sé hætta á að hann skelli á plánetuna okkar af krafti sem jafnist á við þúsundir atómsprengja.

Geimferðastofnun Bandaríkjanna, NASA, hefur þó reynt að draga úr orðum vísindamannanna. Hún segir hættuna á því að loftsteinninn lendi á jörðinni afar litla eða 1 á móti 63.000. Það séu því í raun 99,998% líkur á að hann fari framhjá, líkt og hann gerði í september.

„Við vitum ekki svo mikið um þennan loftstein eða þá braut sem hann er á. En það verður vel fylgst með honum,“ segir Sara Seager, prófessor við MIT í samtali við CNN.

Steinninn er kallaður 2013 TV135 og var í um 6,8 milljóna kílómetra fjarlægð er hann fór næst jörðinni í september. Það er í um 15 sinnum meiri fjarlægð en tunglið er að meðaltali frá plánetu okkar.

NASA segir að stærð steinsins sé ekki mikið áhyggjuefni en hann er talinn vera um 400 metrar í þvermál. Til samanburðar er talið að loftsteinninn sem skall á jörðinni fyrir um 65 milljónum ára og útrýmdi m.a. risaeðlunum hafi verið um einn kílómetri í þvermál. 

• Blogga um frétt