4G hjá Símanum í útlöndum

Svíþjóð hefur nú bæst í hóp þeirra ríkja þar sem viðskiptavinir Símans geta nýtt sér 4G. Síminn hefur boðið uppá 4G samband í Bandaríkjunum frá því í júlí. Íbúar tólf landa reika á 4G kerfi Símans þegar þeir ferðast til Íslands – á neti sem nær til 86,5% landsmanna.     

„Síminn hefur mánuðum saman boðið 4G samband í útlöndum. Við höfum samið um 4G samband í tólf löndum. Þau eru, auk Svíþjóðar og Bandaríkjanna, Þýskaland, Holland, Pólland, Kína, Kanada, Spánn, Finnland, Frakkland, Ungverjaland og Danmörk,“ segir Gunnhildur Arna Gunnarsdóttir, upplýsingafulltrúi Símans, í tilkynningu.

Ferðamenn frá þessum tólf löndum, noti enn sem komið er aðeins lítið brot af því gagnamagni sem fer um 4G kerfi Símans. „Notkun ferðamanna á 4G kerfinu hefur þrefalt meira vægi í ágúst en í júlí, en var þó aðeins innan við prósent af heildinni,“ segir Gunnhildur ennfremur í tilkynningu.

Vægi ferðamanna í gagnanotkun á farsímakerfum Símans hefur aukist milli ára. Litið til netnotkunarinnar, óháð því hvaðan ferðamenn koma eða hvort þeir eru á 3G eða 4G, er ljóst að hún hefur aukist um 90% milli júnímánaða 2014 og 2015 og um helming milli ágústmánaða.

Verð þegar landsmenn ferðast til Evrópusambandslanda hefur lækkað jafnt og þétt undanfarin ár. Þannig verður það einnig í apríl á næsta ári vegna nýrra reglugerða sambandsins.

„Megabætið kostar nú 36,5 krónur hjá Símanum sem er 75% lægra verð en var fyrir þremur árum,“ segir Gunnhildur. Þá er einnig hægt að nýta sér Ferðapakka Símans og fá enn lægra verð fyrir meiri notkun. 

Nánar hér

• Blogga um frétt