Áskrifendur Spotify 30 milljónir

Áskrifendur tónlistarveitunnar Spotify eru orðnir 30 milljónir um heim allan. Daniel Ek, stofnandi fyrirtækisins, greindi frá þessum áfanga á Twitter í dag þegar hann tjáði sig um sögulega heimsókn Barack Obama, Bandaríkjaforseta, til Kúbu.

„Við erum með 30 milljón áskrifendur að Spotify en enginn þeirra er í Kúbu...enn sem komið er. Ótrúlega svalt að sjá að Kúba er að opnast,“ tísti hinn 33 ára Svíi.

Tónlistarsveitur á borð við Spotify hafa notið vaxandi vinsælda síðustu ár.

Spotify greindi frá því í júní síðastliðnum að áskrifendur veitunnar væru orðnir 20 milljónir af þeim rúmlega 75 milljónum sem notuðu hana reglulega.

Hægt er að hlýða á Spotify í 58 löndum, mestmegnis í þróuðum  ríkjum en einnig í þó nokkrum þróunarríkjum í Suður-Ameríku.

Apple Music í öðru sæti 

Tónlistarveitan Apple Music er sú næststærsta í heiminum með um 11 milljónir áskrifenda og næst á eftir kemur Deezer með sex milljónir áskrifenda, sem flestir eru í Evrópu.

Áskrifendur Tidal, tónlistarveitu rapparans Jay-Z og fleiri stjarna, voru ein milljón talsins í september síðastliðnum.

• Blogga um frétt