Páeðlan svonefnda var með gogg sem líktist páfagauksgoggi, með bursta á halanum og var á stærð við labrador-veiðihund. Þrívíddarlíkan af henni sem hópur vísindamanna kynnti í dag er nákvæmasta endurbygging á risaeðlu fram að þessu. Hún var gerð á grundvelli einstaks steingervings sem varðveitti húð og litarefni dýrsins.
Steingerðar leifar páeðla (e. psittacosaurus) finnast reglulega í Kína en tegundin er ein þeirra risaeðlutegunda sem ýtarlegast hafa verið rannsakaðar. Þessi sérstaklega vel varðveitti steingervingur gerði hins vegar vísindamönnum við Háskólann í Bristol á Englandi kleift að búa til nákvæmt líkan af dýrinu sem talið er hafa verið uppi fyrir um 120 milljónum ára.
Endurbyggingin sýnir að páeðlan var að mestu leyti brún á lit en kveður hennar og neðri hluti halans var ljósleitari. Litirnir benda til þess að páeðlan sem gekk á tveimur afturfótum hafi lifað í skóglendi þar sem takmarkað sólarljóst barst í gegnum þétt laufþykknið. Þeir hafi hjálpað henni að fela sig fyrir stærri kjötætum.
„Líkanið okkar bendir til þess að hún hafi verið ofur-, ofursæt. Ég held að þær hefðu verið frábær gæludýr. Þær líktust svolítið E.T.,“ sagði Jakob Vinther, sameindasteingervingalíffræðingur við Háskólann í Bristol þegar endurgerðin var kynnt í dag. Grein um rannsóknina birtist í ritinu Current Biology.
Í frétt Reuters kemur fram að þetta sé í þriðja skipti sem vísindamönnum tekst að endurskapa lit risaeðla út frá steingerðum leifum svokallaðra sortuagna. Þær mynda og geyma litarefnið melanín sem er til staðar í hári, fjöðrum og húð hryggdýra. Þetta er hins vegar í fyrsta skipti sem vísindamenn hafa treyst sér til að setja fram tilgátu um búsvæði risaeðlu út frá litarhafti hennar.