Lekandabakteríur sem eru ónæmar fyrir öllum sýklalyfjum hafa ekki greinst hér á landi. Sóttvarnalæknir segir að fréttir af slíkum bakteríum utan úr heimi séu samt sem áður áhyggjuefni.
Eins og mbl.is sagði frá fyrr í dag er nú erfiðara að meðhöndla lekanda en áður, og í sumum tilvikum ómögulegt samkvæmt nýrri skýrslu frá Alþjóðaheilbrigðismálastofnuninni (WHO). Þar segir að bakterían sé hratt að mynda ónæmi gegn sýklalyfjum.
Frétt mbl.is: Er lekandi að verða ólæknandi?
Þá hafa komið upp þrjú dæmi; í Japan, Frakklandi og á Spáni, þar sem sjúkdómurinn var ólæknandi. Þórólfur Guðnason sóttvarnalæknir segir í samtali við mbl.is að þetta sé vissulega áhyggjuefni, en það eigi eftir að koma betur í ljós hvort bakterían breiðist frekar út.
„Að svo stöddu höfum við ekki ástæðu til að halda að þetta komi til Íslands,“ segir Þórólfur. „En við þurfum auðvitað að fylgjast vel með.“
Einstaklingar sem fá lekanda hér á landi eru meðhöndlaðir með tveimur lyfjum; sprautulyfi í vöðva og lyfi í munn. Að sögn Þórólfs hafa þau virkað í öllum tilfellum.
Lekandi er kynsjúkdómur sem stafar af bakteríunni Neisseria gonorroheae, en bakterían tekur sér bólfestu í kynfærum, þvagrás, endaþarmi eða hálsi. Um 78 milljónir manna smitast af sjúkdómnum árlega, en hann getur valdið ófrjósemi.
Þórólfur segir að fjölgað hafi lekandatilfellum hér á landi undanfarin ár. Nú sé í gangi vinna við að reyna að auka fræðslu og vitund almennings til að stuðla að því að fólk stundi heilbrigt og áhættulítið kynlíf.
Þórólfur segir embættið hafa beint því til lækna að taka ræktunarpróf á bakteríunni, en þá eru sýni send á sýklafræðideild, þau ræktuð og rannsóknir gerðar á því hvort sýklalyf virki.
Alþjóðaheilbrigðismálastofnunin safnaði gögnum frá 77 löndum sem sýna að ónæmi bakteríunnar gegn sýklalyfjum sé að aukast. Sérfræðingar segja að um erfiða stöðu sé að ræða þar sem ekki sé útlit fyrir ný lyf til að meðhöndla sjúkdóminn.