Brýnt er að íslenskt samfélag marki sér stefnu varðandi krabbameinsmeðferðir og hvort bjóða eigi upp á nýjustu meðferðir á þessu sviði, en þær verða sífellt dýrari og sérhæfðari.
Þetta segir Signý Vala Sveinsdóttir, blóðlæknir og settur yfirlæknir blóðlækningadeildar Landspítalans. Tilefnið er ný aðferð við krabbameinslækningar, sem felur í sér erfðafræðilega breytingu á hvítum blóðkornum þannig að hvert þeirra geti deytt allt að 100 þúsund krabbameinsfrumur.
„Hvenær og ef af því verður að þessi meðferð verði í boði hér á landi vitum við ekki,“ segir Signý. „Fyrst þarf leyfið að fást í Bandaríkjunum, eftir það þarf meðferðin að fara undir Evrópsku lyfjastofnunina og síðan leggur lyfjanefnd hér á landi mat á hana. Við erum ekki að tala um daga, vikur eða mánuði – heldur nokkur ár. Þó að niðurstöður rannsókna séu komnar getur liðið langur tími þangað til meðferðin verður veitt almenningi. Þetta er gríðarlega flókin og dýr meðferð,“ segir Signý.