Staða forseta og stjórnar óbreytt
Ólafur Ragnar Grímsson. mbl.is/Ómar
Ólafur Ragnar Grímsson, forseti Íslands, sagðist á blaðamannafundi á Bessastöðum í dag telja, að niðurstaða þjóðaratkvæðagreiðslu um Icesave-lögin hefði hvorki áhrif á stöðu forseta né ríkisstjórnarinnar.
Vísaði hann til þess að engin ríkisstjórn ríkja Evrópusambandsins hefði sagt af sér þótt Maastricht-sáttmálinn hefði verið felldur í þjóðaratkvæðagreiðslu. Líkti Ólafur Ragnar því við tilræði við þjóðaratkvæðagreiðslu ef embætti forseta eða líf ríkisstjórnar væri hengt þar við.
Ólafur Ragnar sagði að sífellt fleiri mál gengju þvert á flokka. Með því að blanda þjóðaratkvæðagreiðslu við tilvist forseta eða ríkisstjórna væri verið að menga eða spilla þjóðaratkvæðagreiðslu sem tæki lýðræðisins.
