Nú fara í hönd síðustu veiðidagar sumarsins á jöklusvæðinu. Í gærkvöldi kom á land stærsti lax í sögu svæðisins frá því að laxveiði hófst þar með skipulögðum hætti árið 2007.
Frá þessu er greint í frétt frá Veiðiþjónustunni Strengjum sem heldur utan um skipulagða veiði á svæðinu. Talsvert er síðan Jökla fór í yfirfall en þrátt fyrir það hefur verið að veiðast ágætlega í hliðaránum í Jökulsárhlíðinni sem eru Kaldá, Fögruhlíðará og Laxá. Lítil ástundun hefur hins vegar verið í september og því veiðistaðir víða vel hvíldir á milli þess sem veiðimenn koma þar við í stuttan tíma.
Greint er frá því að Guttormur Pálsson frá Egilsstöðum hafi til að mynda skotist í árnar í tvo til þrjá daga og hafði 9 laxa upp úr krafsinu. Í gærkvöldi gerði hann sér svo lítið fyrir og lauk veiði með stærsta laxi í sögu Jöklusvæðisins.
Guttormur var þá í Laxá og tók laxinn spón á svokallaðri Efri-Brúarbreiðu sem er rétt neðan við veginn sem liggur niður með hlíðinni. Eftir snarpa viðureign var laxinn mældur 107 cm og reyndist vera hængur og 53 cm í ummáli. Að því loknu var mynd tekin af skepnunni og hann settur í klakkistu og verður notaður til undaneldis nú í haust.
Þetta er stærsti lax sem komið hefur þar á land síðan stangveiði hófst reglulega á Jöklusvæðinu árið 2007, en áður hefur tekist að landa nokkrum sem hafa verð um og yfir 100 cm. Fyrir rúmri viku síðan stóð heildarveiði sumarsins í 332 löxum, en veitt verður til 30. september.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |