Síðastliðinn laugardag var opnuð myntsýning á vegum Myntsafnarafélags Íslands í Hafnarborg í Hafnarfirði. Er þetta þriðja myntsýningin á vegum félagsins, hinar voru í Bogasal Þjóðminjasafnsins árin 1972 og 1979. Er þessi sýning verulega stærri en hinar fyrri og umfangsmeiri, þótt þær þættu góðar á sínum tíma. Sýningin er opin frá klukkan 2 til 6 alla daga og lýkur á mánudagskvöld.
Glæsileg myntsýning MYNT

Hafnarborg

MYNTSAFNARAFÉLAG ÍSLANDS Síðastliðinn laugardag var opnuð myntsýning á vegum Myntsafnarafélags Íslands í Hafnarborg í Hafnarfirði. Er þetta þriðja myntsýningin á vegum félagsins, hinar voru í Bogasal Þjóðminjasafnsins árin 1972 og 1979. Er þessi sýning verulega stærri en hinar fyrri og umfangsmeiri, þótt þær þættu góðar á sínum tíma. Sýningin er opin frá klukkan 2 til 6 alla daga og lýkur á mánudagskvöld. Vil ég hér með skora á sem flesta að skoða sýninguna. ELSTIR eru danskir kúrantseðlar, með íslenskum texta, frá því um 1780 og eru sýnd mörg verðgildi þeirra. Nýjasta greiðsluformið er svo plastkort nútímans, en þau eru fleiri en menn grunar, og sýnd í 7 römmum. Rekur marga í rogastans yfir fjölbreytni þeirrar útgáfu og dást að elju safnarans sem náði þessu safni saman. Sýndar eru allar gerðir íslenskra seðla, útgáfur Landssjóðs, Ríkissjóðs, Landsbankans og Íslandsbanka hins eldri. Hinar gömlu vöruávísanir kaupmanna frá því fyrir og eftir aldamót og frá 1934 til 1960 er seinustu vöruávísanirnar komu í notkun á Eskifirði. Sýndar eru vöruávísanir nokkurra kaupfélaga en af þeim eru svo margar gerðir að það væri of plássfrekt að sýna þær allar. Íslenska myntin er í sínu púlti og einnig er sýnt safn af danskri mynt sem var notuð hér allt til ársins 1930. Fimm til sex hundruð ára mynt frá Tripura furstadæminu á Austur-Indlandi er í einu púltinu. Gjaldmiðill erlendra herja á Íslandi, mynt og ávísanir. Til dæmis miðar, sem notaðir voru í Kamp Knox á stríðsárunum, með verðgildi í íslenskum aurum og krónum. Að auki eru sýndir munir frá hernámsárunum í tveim púltum. Á spjaldi uppi á vegg eru alls kyns seðlar og þar á meðal miði, sem á er prentað "Herinn burt". Íslandsbanka hinum eldri eru gerð góð skil með sýningu á seðlum, sem komu í umferð árin 1904, 1919 og 1920 en á þeim stendur að handhafi geti innleyst þá í gulli úr gullforða bankans. Líka eru þarna gömul hlutabréf í Íslandsbanka, víxlar, tékkar og umslög. Ísspor sýnir framleiðsluferilinn við sláttu minnispeninga. Á miðju gólfi eru þrír plasthjálmar. Undir einum eru til sýnis munir frá Konungskomunni 1907, þeim næsta frá Alþingishátíðinni 1930 og hinum þriðja frá Lýðveldishátíð 1944. Fágætir og fallegir munir margir hverjir. Gamlir eldspýtustokkar koma einnig við sögu á tveim stöðum, m.a. eldspýtnastokkur merktur Thomsens magasíni í Reykjavík. Einnig sígarettukveikjarar af nokkrum gerðum. Skömmtunarseðlar, fagnabúðaseðlar, gömul hlutabréf, gullmynt frá Evrópulöndum, minnispeningar Anders Nyborg með stjörnumerkjum, gamlir flöskumiðar af gosdrykkjaflöskum eru í nokkrum púltum og kössum. Einnig eru sýnd sýnishorn af síldarmerkjum frá nokkrum söltunarstöðvum og er þarna aðeins sýnt brot af miklu stærra safni. Í mörgum römmum eru sparimerki, orlofsmerki, stimpilmerki og auglýsingamerki fyrirtækja. Frímerkjamiðstöðin og Magni eru með söluborð þar sem seldir eru erlendir og íslenskir seðlar og mynt, gömul póstkort, barmmerki, gamlar myndir úr sígarettu- og kaffipökkum, orður frá ýmsum þjóðum og annað fyrir safnara. Tvö glæsileg söfn barmmerkja, félagsmerkja og einkenni starfstétta, sem þeir hafa safnað Ólafur heitinn Jónsson,trésmiður, sem starfaði í félaginu í fjöldamörg ár, og Páll A. Pálsson, ljósmyndari á Akureyri, sem á auk þessa marga aðra muni á sýningunni. Svo sem fram kemur af upptalningunni hér að ofan er margt að sjá og má segja að hver hlutur fái að njóta sín í stílhreinum salarkynnum Hafnarborgar. Á stóru borði liggja frammi bækur til skoðunar fyrir þá, sem vilja kynnast myntsögu heimsins, sýnishorn af kennslubókum í myntsöfnun og verðlistar frá ýmsum löndum. Myntsafnarafélagið hefir nú gefið út nýjan verðlista yfir íslenska mynt og seðla auk sýningarskrár. Í tilefni sýningarinnar hefir verið sleginn minnispeningur og barmmerki auk nýs merkis félagsins. Eru þessir munir til sölu á sýningunni. Nýir félagar eru velkomnir í Myntsafnarafélagið. Margar gamlar ljósmyndir frá Hafnarfirði eru á sýningunni auk umslaga með stimplum pósthúsa í Hafnarfirði og nágrenni. Á sýningunni er guli seðillinn úr Hafnarfirði í ljósriti,og er það vel. Kannske ekki von að hann sé þarna. Á myntsýningunni 1972 innti ég Kristján Eldjárn eftir þessum seðli. Hann sagði mér þá, að hann hefði farið vandlega í gegnum safn Andrésar í Ásbúð, sem hafði safnað ógrynni af alls konar hlutum tengdum Hafnarfirð og sér til mikillar undrunar hefði guli seðillinn ekki verið þar. Ég hefi aldrei séð þennan seðil, sem margir eldri Hafnfirðingar muna eftir, en hann var gefinn út af Hafnarfjarðarbæ á kreppuárunum, en bæjarsjóður var þá svo blankur að öll félagsaðstoð var greidd með þessum seðlum, sem ávísun á úttekt hjá kaupmönnum í Firðinum. Mynd af seðlinum, og sagt er frá honum á bls. 182 og 183 í fyrsta bindi af sögu Hafnarfjarðar eftir Ásgeir Guðmundsson. Ég er viss um að safnarar myndu gjarnan vilja komast yfir þennan seðil, ef einhver finnst og ég skal borga 5000 krónur þeim sem getur sýnt mér ekta seðil.

Ragnar Borg