Matur | Eldhús | mbl | 23.12.2016 | 16:41

Bakar súkkulaðibitakökur í kjól

Anna elskar kjóla, konfekt og huggulegheit. Eggert Jóhannesson

Anna Kristín Magnúsdóttir, eigandi verslunarinnar Kjólar og konfekt, deildi með okkur dásamlegri uppskrift að böns frá New York fyrir skemmstu. Uppskriftin naut mikilla vinsælda svo Önnu var stuggað aftur inn í eldhús þar sem hún töfraði fram nýja uppskrift – og auðvitað í nýjum kjól. Þessar smákökur eru í miklu uppáhaldi hjá Önnu sem á deigið yfirleitt til inni í frysti. „Þá er alltaf eins og ég sé nýbúin að baka og ég lúkka geggjað góð húsmóðir. það er lygi samt.“

Þessar smákökur eru í miklu uppáhaldi hjá Önnu sem á deigið yfirleitt til inni í frysti en deigið þarf helst að vera gert daginn áður en það er notað til að kökurnar takist sem best. Eggert Jóhannesson

Súkkulaðibitakökur

450 gr. hveiti
1 og 1/4 tsk. matarsódi
1 og 1/2 tsk. lyftiduft
1 og 1/2 tsk. salt
280 gr. ósaltað smjör
220 gr. ljóst púðursykur
200 gr. sykur
2 tsk. vanilludropar
tvö stór egg
500 gr. suðusúkkulaði frá Nóa (best að nota dropana)
saltflögur fyrir bakstur

blandið þurrefnum saman í skál.
hrærið smjöri og ljósa púðursykrinum og hvíta sykrinum saman í um 5 mín. Bætið við eggjum einu í einu og svo loks vanilludropum.
Hrærið hægt og rólega þurrefnum saman við á lágum hraða.
Bætið svo súkkulaðinu í og blandið lauslega með sleif.
Skiptið deiginu upp í 4 lengjur, setjið plastfilmu yfir og kælið í 1-2 daga. Ath. mjög mikilvægt að kæla deigið alla vega í einn dag. Ég frysti allt nema eina lengju og á í frystinum. Þá er alltaf eins og ég sé nýbúin að baka og ég lúkka geggjað góð húsmóðir. það er lygi samt.
Hitið ofnin í 180 gráður.
Skerið deigið niður og rúllið í ca. golfkúlustærð. Ýtið þeim svo aðeins niður og setjið 2-3 saltflögur yfir hverja og eina.
Bakið í um það bil 15-18 mín., fylgist samt með, þær eiga að vera frekar mjúkar en smá gylling á að koma á kökurnar.
Borðið kökurnar heitar og drekkið ískalda mjólk með. Það er líka mjög gott að bera þær fram með ís sem eftirrétt.