Guðdómleg eldhús Rutar Kára til leigu

Rut og eiginmaður hennar Kristinn Arnarson keyptu fallegt hús við ströndina á Stokkseyri sumarið 2015 og leigja það í dag út á Airbnb.

Húsið er ákaflega eftirsótt enda einstök hönnunarperla, umvafið náttúrudýrð og humarhamingju. „Við féllum gjörsamlega fyrir húsinu og höfðum fylgst með því frá því að það var byggt árið 2010. Við heimsóttum Stokkseyri nokkuð reglulega því Fjöruborðið er einn af okkar uppáhaldsveitingastöðum. Í hvert sinn sem við komum þangað ókum við fram hjá þessu sérstæða húsi sem minnir um margt á hlöðu. Þegar við sáum húsið auglýst til sölu vorum við mætt á svæðið um leið og vorum mjög lukkuleg með að hreppa þetta hnoss.“

Aðspurð hver hafi verið helsta áskorunin, svarar Rut: Við fengum húsið fullklárað í hendur en við löguðum aðeins innra skipulagið að okkar þörfum. Mesta breytingin var líklega í eldhúsinu þar sem við skiptum m.a. um innréttingar. Helsta áskorunin fólst helst í því að gera breytingarnar á þann hátt að þær féllu að húsinu sem að innan er klætt með vönduðum kvistalausum krossvið.“

Hver sentimetri nýttur

„Eldhúsið er lítið en það er samt mjög gott að vinna í því og ekki spillir fyrir að útsýnið út á sjóinn og ströndina er stórkostlegt. Þegar eldhúsið er lítið skiptir miklu máli að skipulagið sé gott og að vandað sé vel til við valið á heimilistækjum. Við erum þannig með lítinn ísskáp í innréttingunni en erum með annan stærri í þvottahúsinu á neðri hæð. Eldavélin er sambyggð með helluborði og litlum ofni og undir honum er svo lítil uppþvottavél. Þetta er mjög praktískt þar sem nýta þarf hvern sentimetra sem best. Þá slepptum við því að vera með viftu fyrir ofan eldavélina en settum upp hillu sem nýtist til að geyma borðbúnað. Allur borðbúnaður var valinn með það í huga að hann gæti verið fjölnota. Þannig geta t.d. kaffimálin auðveldlega líka verið desertskálar. Skálar sem maður notar við matreiðslu geta líka notast sem morgunverðarskálar.“ Þetta ráð Rutar á einnig mjög vel við á almennum heimilum, sérstaklega ef skápapláss er ekki mikið.

„Flestir vilja gera vel við sig og elda góðan mat þegar þeir koma í sumarhús. Það skiptir því meginmáli að búa eldhúsin vel út og spara ekki í borðbúnaði og græjum. Í raun eru því svipaðar reglur sem gilda um eldhús í sumarhúsum og á heimilum. Í sumarhúsum þarf jafnvel að gera ráð fyrir að fleiri komi að matseldinni. Margir sem leigt hafa sér sumarhús þekkja vonbrigðin þegar eldamennskan hefst og varla er til einn hnífur með biti, eða sómasamleg skál undir salatið.“

Þegar Rut er spurð um hvað henni finnst mikilvægast við hönnun á eldhúsum er hún fljót til svars enda hefur hún hannað mörg einstaklega falleg eldhús: „Í raun gilda sömu lögmál við hönnun eldhúsa og annarra rýma, þ.e. það þarf að vera skipulagt að því sem þar fer fram, lýsing þarf að vera góð og efnin falleg og praktísk. En það sem gerir kannski hönnun á sumarbústöðum jafnvel enn skemmtilegri er að þar getur maður frekar sleppt sér í lita- og efnisvali og leyft sér að fara óhefðbundnari leiðir í útfærslum. Það skiptir mig alltaf miklu máli að vera með fallega hluti í kringum mig, alveg sama hvort það er á heimilinu eða í sumarhúsinu. Mér finnst ekki spennandi að fylla sumarhúsið með gömlu dóti sem búið er að þjóna sínu hlutverki á heimilinu.“