MS boðar byltingu með sykurreyr

„Samfélagið gerir kröfur um að fyrirtæki séu ábyrg í umhverfismálum og raunar eru allir orðnir sér vel meðvitaðir um skyldurnar sem á okkur hvíla um góða umgengni við náttúruna,“ segir Guðný Steinsdóttir, markaðsstjóri Mjólkursamsölunnar. Fyrirtækið setti nýverið á markað nýja gerð mjólkurferna sem eru umhverfisvænni en áður.

Það sem nú telst til tíðinda er að plastið sem notað er í tappann á mjólkurfernum og á innra byrði fernunnar er unnið úr plöntum í stað olíu áður. Umbúðirnar eru þær umhverfisvænstu sem völ er á

„Plastið í tappanum á mjólkurfernum er úr sykurrreyr sem gróðursettur er á rýru beitilandi. Hverja plöntu er hægt að nýta til uppskeru í 5-7 ár áður en planta þarf nýrri. Með þessari nýju aðferð er ekki gengið á takmarkaðar jarðefnaauðlindir við framleiðsluna og á sama tíma er dregið úr losun koltvísýrings út í andrúmsloftið,“ segir Guðný Steinsdóttir þegar hún lýsir helsta muninum milli nýja plastsins og þess hefðbundna.

Ari Edwald Forstjóri MS er að vonum ánægður með nýju fernurnar sem fara betur með lífríkið. mbl.is/Styrmir Kári