Veitingastaðir eru margir og mismerkilegir en þessi kemst klárlega á blað með þeim snjallari. Um er að ræða tveggja daga pop-up-veitingastað sem kallast The Restaurant of Order Mistakes (sem er tilbrigði við bókina The Restaurant of Many Orders) og opnaði í Tókýó á dögunum.
Markmiðið: Að ráða eingöngu þjóna með heilabilun.
Það var því vitað að stórar líkur væru á að pantanir væru vitlaust afgreiddar en vitneskjan um að slíkt geti gerst breytir stórlega upplifun viðskiptavinarins af mistökunum. Tilgangurinn var að bæta skilning fólk á heilabilun og skynjun fólks sem þjáist af ýmiss konar sjúkdómum sem hafa árhif á minni. Þeir sem þjáist af heilabilun geti enn verið á vinnumarkaðinum en nærgætni sé þörf vegna takmarkana þeirra.
Veitingastaðurinn var opinn frá 2.-4. júní og tókst svo vel að til stendur að endurtaka leikinn í haust þegar alþjóðlegi Alzheimerdagurinn verður haldinn 21. september.
Matarbloggarinn Mizuho Kudo heimsótti veitingastaðinn og skemmti sér konunglega. Hún pantaði sér hamborgara en fékk gyoza-dömplinga í staðin. Hins vegar smakkaðist maturinn dásamlega og Kudo hafði sérstaklega á orði að hún hefði sjaldan séð jafnbrosmilda þjóna.