Veitingahúsið Sumac sérhæfir sig í líbanskri og marokkóskri matargerð en lítið hefur farið fyrir slíkri matargerð í miðbæ Reykjavíkur. Eigandi staðarins er Þráinn Freyr Vigfússon, fyrrverandi þjálfari íslenska kokkalandsliðins. Matargerðin einkennist af eldgrilluðum mat þar sem framandi krydd, jógúrtsósa og marineringar, eggaldin, hummus, granateplakjarnar og almenn gleði eru í forgrunni.
„Hugmyndin hefur þróast síðan 2011 í það sem hún er í dag. Ég er búinn að hafa mikinn áhuga á þessari matreiðslu og langað að koma með eitthvað nýtt í veitingahúsamarkaðinn í Reykjavík,“ segir Þráinn en móttökurnar hafa verið stórgóðar og færri hafa komist að en viljað á prufukvöldum.
Hann segist vonast til að getað opnað staðinn formlega í næstu viku.
Staðurinn er hannaður af Hálfdáni Petersen og er skemmtilega hrár þótt ljósir leðurbekkir og gylltir lampar komi með hlýjuna á móti gráum steyptum veggjum.
„Sumac sækir innblástur innviða og andrúmslofts frá borginni Beirút í Líbanon, og nostalgíunni sem þar svífur yfir vötnum. Hið fína og fágaða mætir hinu hrjúfa og hrjóstruga, í borginni sem áður var nefnd París austursins,“ segir eigandinn en Sumac er staðsett á Laugavegi 28 þar sem Bunk bar var áður.