Mánudagsveislan: Sjúkleg blómkálspizza

Sjúklega girnileg...
Sjúklega girnileg... mbl.is/Hanna Þóra

Það er fátt meira viðeigandi á þessum mánudegi en dásamleg pítsa sem er ekki bara stórkostlega góð heldur einnig afbragðsholl og nauðsynleg tilbreyting frá helgarmatnum og smákökunum.

Það er Hanna Þóra sem á heiðurinn af þessari uppskrift en inni á blogginu hennar er að finna ítarlegri lýsingar á aðferðinni við botninn.

Frábær blómkálspizza – fljótleg og sérstaklega góð

Sá þessa uppskrift að blómkálspizzu í erlendu tímariti. Fannst hún spennandi en hún er svo miklu meira en það – þessi pizza er sérstaklega bragðgóð, fljótleg og það kom skemmtilega á óvart að hún er líka barnvæn. Unga fólkinu fannst hún mjög góð.

Hráefni

Pizzubotnar

  • 500 – 600 g ferskt blómkál
  • 1 tsk. gróft salt
  • 1 dl rifinn ostur
  • 1 msk. husk (má einnig nota innihald úr 2 hylkjum – þessu má sleppa)
  • 1 egg
  • 1 tsk. oregano
  • 1 tsk. Italian seasoning
  • Svartur pipar
  • 1 msk. olía – til penslunar (má sleppa)

Ofan á – frjálst val – hugmyndir 

  • Rifinn ostur
  • 1 – 1½ dl pizzusósa – Heimagerð pizzusósa
  • Mosarellaostur – skorinn í sneiðar
  • Salamísneiðar
  • Kapris
  • Grænt pestó
  • Rjómaostur/geitaostur
  • Fíkjur – skornar í sneiðar (á sérstaklega vel við geitaost)
  • Skraut eftir bakstur: T.d. ferskir, litlir tómatar, rifinn parmesanostur og/eða klettasalat

Verklýsing

Pizzubotnar

  1. Blómkál maukað mjög smátt í matvinnsluvél.
  2. Salti blandað saman við og látið standa í 10 mínútur. Maukið sett í sigti, sigtipoka eða látið síast í gegnum grisju. Vökvinn undinn úr (annars verður botninn of blautur).
  3. Ofninn hitaður 225°C.
  4. Allt hráefni sett í skál og því blandað saman.
  5. Maukinu skipt á tvo bökunarpappíra (penslað með olíu á pappírinn – ekki nauðsynlegt) og flatt út með kökukefli eða fingrunum – best að nota bökunarpappír á milli svo að klístrist sem minnst.
  6. Pizzurnar bakaðar í ofninum í u.þ.b. 15 mínútur – látnar kólna.
  7. Áleggið sett ofan á og bakað áfram í ofninum í 9 – 11 mínútur. Best að baka pizzurnar á grind þannig að vel lofti undir þær.

Geymsla

Pizzurnar eru bestar nýbakaðar en þær eru líka mjög fínar daginn eftir  – hita þær aðeins.

mbl.is
Fleira áhugavert
Fleira áhugavert