Sautján ára gamall tyrkneskur piltur, Nuri Sahin, hefur slegið í gegn að undanförnu með Dortmund og landsliði Tyrklands. Chelsea hefur fylgst grannt með honum eins og áður hefur komið fram og umboðsmaður stráksins sagði í dag að Liverpool og Arsenal hefðu staðfest áhuga sinn á honum.
Nuri Sahin varð 17 ára í september og í ágúst varð hann yngsti leikmaður í þýsku 1. deildinni frá upphafi þegar hann lék 16 ára og 335 daga gamall með Dortmund. Í gær lék hann sinn fyrsta A-landsleik fyrir Tyrkland, kom inná sem varamaður gegn Þýskalandi á 86. mínútu og skoraði, 2:0, þremur mínútum síðar en leikurinn endaði með sigri Tyrkja, 2:1.
"Draumur hans er að spila í Englandi og þar er Chelsea eitt af stóru liðunum, en Arsenal og Liverpool hafa líka sýnt honum mikinn áhuga. Ég hef þó ekki trú á því að Dortmund selji hann strax," sagði umboðsmaðurinn, Kazim Avci.
Arsenal bauð 2,5 milljónir punda, tæpar 300 milljónir króna, í Sahin í sumar en Dortmund hafnaði boðinu. Talið er að þýska félagið ætli ekki að láta hann fara fyrir minna en 10-14 milljónir punda, eða vel á annan milljarð króna.
"Hann er framtíðarmaður hjá okkur og á eftir að láta vel til sín taka í 1. deildinni með okkur. Við erum ekki með nein áform um að selja hann," sagði Hans-Joachim Watzke, framkvæmdastjóri Dortmund.
Sjá einnig enski.is