Arsenal og Cole kæra tvö dagblöð

Enska knattspyrnufélagið Arsenal og einn leikmanna þess, Ashley Cole, hafa lagt fram kærur á hendur tveimur enskum dagblöðum, News of the World og Sun, fyrir ærumeiðingar, persónulegar árásir og brot á friðhelgi einkalífs í skrifum sínum um tvo ónafngreinda knattspyrnumenn.

Blöðin fjölluðu um leikmennina á opinskáan hátt, meðal annars um meinta kynhneigð þeirra, og þó þeir væru ekki nafngreindir þótti all ljóst við hverja var átt. Í kjölfarið fóru af stað afar líflegar umræður á hinum ýmsu spjallsvæðum á veraldarvefnum.

Cole, sem er trúlofaður þekktri sjónvarpsleikkonu, Cheryl Tweedy, hefur átt erfitt uppdráttar, innan vallar sem utan, undanfarna mánuði. Hann hefur verið frá vegna meiðsla síðan í október þegar hann braut bein í rist, og þegar hann var að komast í gang á dögunum tognaði hann á ökkla í leik með varaliði Arsenal og verður frá í þrjár vikur í viðbót.

Þá átti Cole í málaferlum þegar hann áfrýjaði úrskurði stjórnar úrvalsdeildarinnar sem sektaði hann um 75 þúsund pund, kringum 8 milljónir króna, fyrir að ræða við Chelsea um mögulegan samning án leyfis. Áfrýjuninni var hafnað.

Sjá einnig enski.is

• Blogga um frétt