Nýtt lag með Í svörtum fötum er komið í spilun og heitir það „Þrá". Það verður að finna á nýrri plötu sveitarinnar sem væntanleg er á næstu vikum. Þetta er þó skrifað vegna söngkonunnar sem leggur sveitinni lið í laginu. Hún heitir Sylvía Rut Sigfúsdóttir, er sextán ára gömul, og hefur komið fyrir augu landans í þættinum Stjörnuleit á Stöð 2, þar sem fólk spreytir sig í söng. Sylvíu var ekki hleypt áfram af dómurum keppninnar og þótti brotthvarf Sylvíu vera afar dramatískt þar sem músum var brynnt og taugarnar þandar til hins ýtrasta.
Jónsi, söngvari Í svörtum fötum, segir frá ástæðum þess að sveit hans ákvað að leita á náðir Sylvíu vegna söngkafla sem þá vantaði í lagið.
"Það var partur í byrjun lagsins sem við vorum ekki vissir um hvernig við ættum að ganga frá. Það var alla vega á hreinu að ég ætti ekki að syngja þetta en við vorum heldur ekki vissir á hvaða hljóðfæri gæti tæklað þetta. Það var svo þegar ég og konan mín vorum að horfa á Stjörnuleit að við sáum Sylvíu syngja og það var nákvæmlega það sem vantaði!"
Jónsi segir að þeir hafi vélað um rödd Sylvíu og að téður kafli komi fyrir á fjórum stöðum í laginu.
Sylvía segir að hún hafi að sjálfsögðu slegið til þegar hún fékk símtalið frá Jónsa. Hún segir að í fyrstu hafi hún talið þetta grín og það var ekki fyrr en Rósa, kona Jónsa, kom í símann að það tókst að sannfæra hana um að þetta væri ekki gabb.
Sylvía segir að í téðum þætti hafi hún orðið fyrir ákveðnu spennufalli eftir að hafa flutt lagið. Og hún gráti það ekkert að hafa ekki farið áfram, svona eftir á. En spennan hjá keppendum í þættinum sé gríðarleg engu að síður og þetta taki virkilega á.
Sylvía segist að lokum ekkert vita um áframhaldið hjá sér en reynslan og skemmtunin af því að vinna með Í svörtum fötum hafi verið frábær. Bara það að kynnast t.d. vinnu í hljóðveri hafi haft mikið að segja.
Ný plata Í svörtum fötum kemur út í byrjun nóvember. |