Madonna er stödd í Afríkuríkinu Malaví þar sem hún hyggst aðstoða munaðarlaus börn sem eru smituð af HIV-veirunni og alnæmi. Þá hefur Madonna í hyggju að ýta sex verkefnum úr vör sem miða að því að veita afskiptum börnum aðstoð.
Að sögn malavísks embættismanns þá vonast Madonna til þess að hún geti ættleitt afrískt barn.
Benston Kilimbe, sem starfar hjá félagsmálastofnun landsins, heldur því fram að Madonna muni brátt senda inn skjöl er lúta að ættleiðingu barns. Poppdrottningin sjálf hefur hinsvegar ekki tjáð sig um málið.
Madonna og eiginmaður hennar, Guy Ritchie, eiga fyrir tvö börn, soninn Rocco, sem er fimm ára, og fyrir átti Madonna dótturina Lourdes, sem er níu ára.