Múslímar mótmæla stuðningsmannalagi Schalke

Þýska knattspyrnufélaginu Schalke hafa borist hundruð tölvubréfa frá reiðum múslímum í kjölfar þess að tyrkneskir fjölmiðlar tóku til umfjöllunar lag stuðningsmanna liðsins. Í þriðja versi texta lagsins segir: „Múhameð var spámaður sem ekkert þekkti til fótbolta. En af öllum fallegum litum valdi hann blátt og hvítt.“ Búningar Schalke eru bláir og hvítir að lit.

Forsvarsmenn félagsins hafa farið sérfræðingi í málefnum íslam að fara yfir málið og taka til athugunar hvort lagið feli í sér móðgun við múslíma. Lögreglan í Gelsenkirchen, heimabæ Schalke, tekur kvartanirnar einnig mjög alvarlega.

Samkvæmt því sem kemur fram í þýskum fjölmiðlum var textinn saminn árið 1924, en óvíst er hvenær umræddri vísun í Múhameð var bætt inn í hann.

Klausan á þýsku er á þessa leið: „Mohammed war ein Prophet, der vom Fussballspielen nichts versteht. Doch aus all der schoenen Farbenpracht hat er sich das Blau und Weisse ausgedacht.“

• Blogga um frétt