„Það var gaman en jafnframt stressandi, “ segir Kristín Jónsdóttir, 21 árs gamall laganemi, um upplifun sína af fyrsta bæjarstjórnarfundinum en á fimmtudag varð hún yngsti bæjarfulltrúinn til að sitja fund í bæjarstjórn Garðabæjar þegar hún kom inn sem varamaður fyrir Sjálfstæðisflokkinn.
„Þetta var allt mjög formlegt, að fara upp í pontu og ávarpa fólk sem „ágæti bæjarfulltrúi“.“ Kristín er fjórði varamaður inn í bæjarstjórn og átti því líklega seint von á að verða kölluð til en þegar tveir bæjarfulltrúar flokksins forfölluðust og tveir varamenn sáu sér ekki fært að mæta var Kristín skyndilega orðin næst inn í bæjarstjórn, að því er fram kemur í Morgunblaðinu í dag.