Bréf sem var sent fyrir 45 árum birtist með dularfullum hætti í póstkassa kanadískrar konu. Bréfið var frá systur hennar, sem var níu ára er hún sendi bréfið árið 1969.
Með bréfinu fylgdi afsökunarbeiðni frá kanadíska póstinum. Þar var beðist afsökunar á því að bréfið væri í slæmu ástandi - ekki því að það hefði borist viðtakanda 45 árum eftir að það var sent.
„Kæri viðskiptavinur. Okkur þykir mjög leitt að bréfið þitt hafi skemmst. Það fannst í þessu ástandi í póstkerfi okkar,“ sagði í bréfinu frá póstinum.
Bréfið var stílað á herra og frú R.D. Tingle. Aðeins götunafn var skrifað utan á umslagið og rangt númer hússins. Ekki kom fram til hvaða borgar bréfið átti að fara.
Engu að síður hefur bréfið nú loks ratað í réttar hendur.
Í bréfinu er ljóð sem litla systir konunnar samdi.