Forsvarsmenn palestínsku samtakanna Hamas og Jihad sömdu um vopnahlé síðastliðna nótt eftir tveggja daga átök liðsmanna samtakanna á Gasasvæðinu. Einn maður lést og átján slösuðust í átökum samtakanna um helgina en spenna mun hafa verið að byggjast upp á milli liðsmanna þeirra á undanförnum vikum Þetta kemur fram á fréttavef Ha’aretz.
Átök helgarinnar brutust út í bænum Rafah á laugardag eftir að liðsmenn Jihad reyndu að ræna liðsmanni Hamas-samtakanna. Liðsmenn öryggissveita Hamasamtakanna komu hins vegar í veg fyrir mannránið og handtóku fimmtán liðsmenn Jihad í kjölfar þess.
Til átaka kom einnig á milli liðsmanna Hamas-samtakanna og Fatah hreyfingarinnar á Gasasvæðinu í gær og létu tveir menn lífið í þeim og tuttugu særðust.