Funda með Kínverjum um efnahag

Þingmenn í Bandaríkjunum freista þess nú að styrkja sambandið við Kína í von um að það leiði til betri tíðar fyrir efnahagslíf heimsins. Fulltrúar frá Demókrötum og Repúblikönum er nú staddir í Kína til þess að efla tengsl og ræða um lausnir á vandanum.

Kínverska ríkið er umfangsmikill fjárfestir í Bandaríkjunum, sérstaklega á skuldabréfamarkaði. Kína á mikið undir því að bandarískur efnahagur nái sér aftur á strik. Tölur sem seðlabanki Bandaríkjanna birti í gær, þykja benda til að samdrátturinn í bandarískum efnahag hafi hingað til verið vanmetinn.

Í viðtali við AFP-fréttastofuna segir Mark Kirk, sem fer fyrir hópi Repúblikana sem staddir eru í Kína, að fyrst og fremst sé einblínt á stöðu efnahagsmála í heiminum. „Við leggjum áherslu á efnahagsmál, öðru fremur, og þá helst hvernig Bandaríkin og Kína geta unnið saman að því að ná heiminum upp úr þeirri lægð sem þegar hefur leikið þjóðir grátt,“ sagði Kirk.

• Blogga um frétt