Bandaríska landbúnaðarráðuneytið og dýralækningaháskóli í Iowa hafa staðfest að 13 ára gamall köttur hafi smitast af svínaflensu (H1N1), en eigendur kattarins höfðu greinst með flensulík einkenni.
Talsmaður ráðuneytisins telur að þetta sé mögulega í fyrsta sinn sem svínaflensa greinist í ketti eða hundi. Hann segir að meðal einkenna kattarins hafi verið þreyta, öndunarörðugleikar og lítil matarlyst.
Þrátt fyrir að vitað sé til þess að flensan geti smitast á milli dýrategunda þá hefur það ekki sést hvað varðar þetta afbrigði að sögn talsmannsins. Þetta hafi t.d. verið staðfest í fuglum og mörðum.
Hann segir að margir dýralæknar hafi sagt við fólk að það séu litlar líkur á því að flensan geti smitast á milli þeirra og kattanna, eða hundana. Ofangreindar niðurstöður breyti því.
Fólk verði að hafa sama viðbúnað í huga varðandi dýrin og mannskepnuna til að koma í veg fyrir eða draga úr smiti. Fólk eigi að láta bólusetja sig, nota grímur, halda sig frá þeim og þvo sér vel um hendurnar.