Stefnt að plastpokalausri París

Plastpokabann er rætt víða um heim og er Frakkland þar ekki undanskilið. Borgarstjórn Parísar stefnir að því að borgin verði fyrsta plastpokalausa borgin þar í landi en orkumál voru rædd á franska þinginu í vikunni.

Í frétt á The Local vefnum kemur fram að það hefur lengi verið á stefnuskrá ríkisstjórnar sósíalista að útrýma plastpokum og nú virðist það takmark vera að færast nær þar sem lagt er til að hætt verði að bjóða upp á plastpoka í matvöruverslunum landsins.

Ségoléne Royal, umhverfisráðherra, segir að að það sé mikilvægt skref sem stigið verður ef því markmiði verður náð. Það að fá plastpoka í matvörubúðinni sé eitthvað sem tilheyri fortíðinni.

Samkvæmt frumvarpi til laga verða plastpokar bannaðir í verslunum frá og með 1. janúar 2016. Þegar talað er um plastpoka er ekki verið að tala um plastpoka sem eru margnota eða brotna auðveldlega niður í náttúrunni. Þrátt fyrir að ekki sé bann í gildi þá hefur stórlega dregið úr plastpokanotkun í Frakklandi. 

Borgarstjórinn í París, Anne Hidalgo, hefur tekið saman höndum með matvöruverslunarkeðjum borgarinnar um að reyna að gera borgina fyrstu borgina í Frakklandi þar sem plastpokar eru ekki notaðir. 

Twitter færsla borgarstjórans í París

• Blogga um frétt