David Cameron, forsætisráðherra Bretlands, varði í dag bresku leyniþjónustuna og hét því að gera út um hryðjuverkamenn innan samtakanna sem kenna sig við íslamskt ríki.
Leyniþjónustan MI5 hefur legið undir gagnrýni eftir að fjölmiðlar nafngreindu manninn sem kallaður hefur verið Jihadi John og komið hefur fram í myndböndum sem sýna afhöfðanir vestrænna gísla í haldi Ríkis íslam. Maðurinn, Mohammed Emwazi, hefur verið á lista MI5 frá því árið 2009 og segja ýmsir því óskiljanlegt að honum hafi tekist að komast til Sýrlands óséður.
Cameron sagði leyniþjónustumenn í heild hafa staðið sig vel og að allt verði gert sem í valdi þeirra stendur til að koma böndum yfir Emwazi og aðra böðla íslamska ríkisins.
Emwazi, sem er fæddur í Kúveit, er 27 ára og menntaður í Lundúnum. Hann birtist fyrst á myndskeiði frá Ríki íslams í ágúst þar sem hann sést afhöfða bandaríska blaðamanninn, James Foley. Jafnframt er talið víst að hann hafi einnig tekið að sér hlutverk böðulsins við aftökur breska hjálparstarfsmanninum David Haines, bandaríska blaðamannsins Steven Sotloff, breska leigubílstjórans Alan Henning og bandaríska hjálparstarfsmanninn Abdul-Rahman Kassig, sem einnig er þekktur undir nafninu Peter.