Einn af þremur upplifað kynferðislegt áreiti

Einn af hverjum þremur Dönum á aldrinum 18-34 ára hefur orðið fyrir kynferðislegu áreiti í daglegu lífi. Einn af hverjum sex Dönum á fullorðinsaldri hefur upplifað slíkt hið sama. Þetta er niðurstaða nýrrar rannsóknar sem danska ríkisútvarpið hefur birt.

Í rannsókninni er fólk spurt hvort það hafi upplifað slíkt áreiti við daglega iðju, svo sem ferðalög til og frá vinnu, á vinnustað, í verslunum, hjá læknum ofl. Alls svöruðu 17% spurningunni játandi en hlutfallið er enn hærra, eða 29%, hjá yngsta aldurshópnum, 18-34 ára.

Það er mikill munur á milli kynjanna því aðeins einn af hverjum fjórtán körlum hafa upplifað slíkt áreiti en ein af hverjum fjórum konum. 

Irene Manteufel, sem stýrir verkefni sem snýr að kynferðislegu áreiti í daglegu lífi í Danmörku, segir að þau hafi safnað upplýsingum frá um 1900 konum sem lýstu óviðeigandi hegðun sem þær höfðu upplifað. 

Má þar nefna ummæli, gripið í þær, þær klipnar í rassinn ofl. Danskir sérfræðingar segja að þar sem umræðan fari ekki hátt þá telji margar kvennanna að þær beri sjálfar ábyrgð, til að mynda séu þær í of stuttum pilsum eða buxum og svo mætti lengi telja. Þessu þurfi að breyta því það sé ekki við konurnar að sakast heldur menn sem ganga of langt.

Rannsóknin

• Blogga um frétt