Borgarstjóri Rómarborgar, Ignazio Marino, hefur sagt af sér vegna ásakana þess efnis að hann hafi greitt fyrir mat á veitingastöðum með opinberu fé.
Marino neitar ásökununum en bauðst til þess að greiða til baka 20 þúsund evrur (2,8 milljónir íslenkra króna) snemma í morgun. Síðar í dag greindi hann frá því að hann myndi segja af sér eftir að í ljós kom að flokkur hans stæði ekki lengur á bakvið hann. BBC segir frá þessu.
Marino hefur áður verið gagnrýndur fyrir störf sín sem borgarstjóri. Kallað var eftir því á síðasta ári að hann myndi segja af sér eftir að upp komst að hann hefði ekki greitt fjölmargar stöðumælasektir. Fylgi hans hrapaði jafnframt töluvert eftir að spilling komst upp í borgarstjórninni.
Marino tók við sem borgarstjóri 2013. Hann hefur einnig verið gagnrýndur fyrir að stöðva ekki glysgjarna útför meints mafíuforingja í ágúst.
Í dag sagði Marino að ekki væri hægt að líta á afsögn hans sem viðurkenningu á sök en sagði að „pólitískar aðstæður“ gerðu honum ekki kleift að halda áfram sem borgarstjóri.