Japanskur þingmaður, sem var mjög í fréttum japanskra fjölmiðla í síðasta mánuði þegar hann var fyrsti karlþingmaður landsins til þess að óska eftir fæðingarorlofi, sagði af sér þingmennsku í dag og játaði að hafa haldið fram hjá konu sinni þegar hún var komin á steypirinn.
Þingmaðurinn Kensuke Miyazaki baðst í dag afsökunar á því að hafa valdið uppþoti en hann tilkynnti á fundi með blaðamönnum í dag að hann segði af sér þingmennsku.
Þegar Miyazaki óskaði eftir því í janúar að fá að taka fæðingarorlof varð uppi fótur og fit í japönsku samfélagi. Töldu margir að með því væri hann að vanrækja skyldur sínar sem þingmaður en aldrei áður hefur japanskur karlkynsþingmaður óskað eftir því að fá að taka fæðingarorlof.
Fyrr í vikunni birti japanska slúðurblaðið Shukan Bunshun mynd af Miyazaki og konu, sem samkvæmt fréttinni er sundfatafyrirsæta og sérfræðingur í því hvernig eigi að klæðast kimono. yfirgefa heimili hans í Kyoto. Samkvæmt frétt blaðsins var myndin tekin nokkrum dögum áður en eiginkona hans, stjórnmálamaðurinn Megumi Kaneko, fæddi barn 5. febrúar. Þau eru bæði flokksfélagar í Frjálslyndum demókrötum sem eru í stjórn landsins.
Í dag viðurkenndi Miyazaki framhjáhaldið og að hann myndi segja af sér þingmennsku fyrir Kyoto-kjördæmi. Hann segist hafa kynnst fyrirsætunni þegar hún aðstoðaði hann og fleiri þingmenn að klæðast kimono á upphafsfundi þingsins á nýju ári, 4. janúar sl.
Hann segist reka minni til þess að hafa hitt hana þrisvar eftir það. Þau séu ekki lengur í sambandi. Að sögn Miyazaki hefur hann útskýrt málið fyrir eiginkonu sinni og hann sjái mjög eftir því að hafa hegðað sér á þennan hátt.
Þegar hann var spurður að því hvort hann hafi átt í ástarsamböndum við aðrar konur sagðist hann ekki geta hafnað því. Hann bað síðan um að eiginkona hans og barn fengju frið fyrir ágangi fjölmiðla.