Tala látinna í jarðskjálftanum á Súmötru í gærkvöldi heldur áfram að hækka og er nú komin upp í 97 manns, að því er fréttavefur BBC greinir frá. Á þriðja hundrað manns slösuðust í skjálftanum, sumir alvarlega.
Jarðskjálftinn, sem mældist 6,5 stig, varð á litlu dýpi í Pidie Jaya-sýslu í Aceh-héraði. Hann reið yfir snemma morguns að staðartíma, þegar íbúar sem eru flestir múslimar, voru á leið til morgunbæna. Hundruð bygginga hrundu til grunna í skjálftanum.
Frétt mbl.is: 52 farast í jarðskjálfta á Súmötru
„Til þessa höfum við fundið 97 látna og talan heldur áfram að hækka,“ sagði Tatang Sulaiman, yfirmaður hersins, í sjónvarpsviðtali.
Um 150.000 manns búa í Pidie Jaya, sem er við norðurströnd Aceh og um 110 km frá héraðshöfuðborginni Banda Aceh.
Talsmaður almannavarna Indónesíu, Sutopo Nugroho, sagði rúmlega 200 verslanir og heimili hafa eyðilagst í skjálftanum, sem og 14 moskur. Þá hefðu orðið miklar skemmdir á sjúkrahúsi og skólum á svæðinu.
„Við óttumst að tala látinna muni halda áfram að hækka, þar sem líklegt er að fólk sé enn grafið undir rústunum. Björgunaraðgerðir eru nú í fullum gangi,“ sagði Nugroho. Þúsundir hermanna og björgunarsveitamanna hafa verið sendar á staðinn.
Enginn flóðbylgjuviðvörun var gefin út vegna jarðskjálftans í gær, en Aceh hérað varð illa fyrir barðinu á flóðbylgjunni á Indlandshafi 2004, sem kostaði meira en 160.000 mannslíf í Indónesíu.