Staðfest hefur verið að í það minnsta 14 manns eru látnir eftir að snjóflóð féll á ítalskt hótel á miðvikudag. Björgunaraðgerðir standa enn yfir en 15 er enn saknað, nú á sjötta degi leitarinnar.
Ellefu starfsmenn og gestir lifðu af hamfarirnar. Tveir þeirra voru úti þegar snjóflóðið skall á byggingunni en níu aðrir, þar á meðal fjögur börn, fundust á lífi á föstudagsmorgun.
Lík sex manna hafa fundist undanfarinn sólarhring og ólíklegt þykir að nokkur finnist á lífi úr því sem komið er.
Björgunarmenn á svæðinu neita þó að gefa upp vonina, sem jókst í gær eftir að þrír hvolpar fundust heilir á húfi í rústunum.
Ítölsk yfirvöld rannsaka á sama tíma þá atburðarás sem átti sér stað fyrir snjóflóðið, til að athuga hvort hægt hefði verið að forðast þennan harmleik.
Frétt mbl.is: Hafði varað yfirvöld við ástandinu