Kim Jong-Nam fékk ekki hjartaáfall og á líki hans fundust engin stungusár. Það er talið útiloka þá kenningu að hann hafi verið stunginn á flugvellinum Kuala Lumpur með eitruðum nálum.
Þetta er meðal niðurstaðna krufningar á líki hans, sem framkvæmd var á sjúkrahúsi í Malasíu. Niðurstöðurnar voru kynntar á fjölmennum blaðamannafundi í líkhúsinu. Ráðuneytisstjóri heilbrigðisráðuneytisins sagði á fundinum að dánarorsök yrði ekki uppgefin fyrr en endanlegar niðurstöður úr eiturefnaprófunum lægi fyrir.
Stjórnvöld í Suður-Kóreu telja að Kim, sem er eldri bróðir Kim Jong-Un, einræðisherra Norður-Kóreu, hafi verið myrtur. Telja þau að fyrir hann hafi verið eitrað og að bróðir hans standi að baki morðinu.
Kim Jong-Nam fór að finna fyrir óþægindum í öndunarvegi á flugvellinum í Kuala Lumpur. Hann var þá að bíða eftir flugi til Macau, sjálfstjórnarsvæðis í Kína, þar sem hann hefur dvalið undanfarin ár. Kim sagði við tollvörð á flugvellinum að tvær konur hefðu haldið tusku að vitum sínum. Í gær voru birtar upptökur úr eftirlitsmyndavélum af flugvellinum sem þykja styðja þá frásögn hans.
Fjórir hafa verið handteknir í tengslum við morðið, þar af tvær konur. Önnur þeirra segist hafa haldið að hún væri að taka þátt í gerð grínþáttar.
Yfirvöld í Malasíu hafa óskað eftir því að ættingjar Kims komi þangað til að bera kennsl á líkið. Það hafa þeir ekkert gert. Norðurkóresk yfirvöld hafa hins vegar farið fram á að fá líkið afhent. Á það hefur enn ekki verið fallist.
Kulnun hefur orðið í samskiptum Malasíu og Norður-Kóreu af þessum sökum. Sendiherra Norður-Kóreu hefur m.a. opinberlega sakað malasísk yfirvöld um að „vinna með óvininum“ við rannsókn á andláti Kims Jong-Nam og átti þar við suðurkóresk yfirvöld.
Kim var elsti sonur Kims-Jong-Il, fyrrverandi leiðtoga Norður-Kóreu. Samband þeirra feðga versnaði skyndilega árið 2001, mögulega vegna ferðar Kims til Japans en þangað reyndi hann að komast á fölsuðum ferðaskilríkjum til að heimsækja Disneyland.
Kim hefur talað fyrir umbótum í heimalandi sínu og það hefur fallið í grýttan jarðveg hjá yngri bróður hans, Kim Jong-Un. Þá hefur Kim eldri notið verndar kínverskra yfirvalda frá því að hann fór í útlegð og er af þeim talinn réttmætur arftaki valdastólsins í Norður-Kóreu. Þetta hugnaðist litla bróður ekki. Kenningin er því sú að þetta sé ástæðan fyrir því að hann lét ráða hann af dögum.