Þrjú börn létu lífið í skemmtigarði í norðvesturhluta Tyrklands í dag þegar rafmagn komst í sundlaug sem þau léku sér í. Tveir fullorðnir, framkvæmdastjóri garðsins og sonur hans, létu einnig lífið eftir að hafa stungið sér í laugina til þess að reyna að bjarga börnunum.
Fólkið var allt flutt á sjúkrahús samkvæmt frétt breska ríkisútvarpsins BBC en ekki ryendist mögulegt að bjarga því. Rannsókn á málinu er þegar hafin en ekki liggur fyrir hvernig rafmagn komst í sundlaugina. Fimm aðrir slösuðust og voru einnig fluttir á sjúkrahús.
Framkvæmdastjóri skemmtigarðsins var 58 ára gamall og sonur hans þrítugur. Ekki kemur fram í fréttinni á hvaða aldri börnin voru.