Þeir eru ekki sérstaklega vinsælir, nýjustu íbúar Berlínarborgar. Þeir eiga það til að láta ófriðlega á götum, valda jafnvel umferðarslysum og grafa í görðum nágrannanna.
Það eru sum sé ekki allir Berlínarbúar sáttir við öll þau villisvín sem hafa hreiðrað um sig á hinum fjölmörgu grænu svæðum sem borgin er þekkt fyrir.
Talið er að um 3.000 villisvín séu nú innan borgarmarkanna, flest í skógivöxnum görðum sem þar má finna.
Fólk nýtir garðana til útivistar og dæmi eru um að villisvínin hafi ráðist á það og slasað.
Villisvínin eru engin smásmíði. Þau geta verið um 120 kíló að þyngd og eru ekki sérstaklega mannelsk.