Að minnsta kosti 14 manns létust og fjölmargir særðust þegar bílsprengja sprakk fyrir utan hótel í Mogadishu, höfuðborg Sómalíu, í dag. Óttast er að tala látinna eigi eftir að hækka.
„Sprengingin var gríðarlega hávær. Fjöldi látinna er þegar orðinn 14 og fjölmargir særðust,“ segir Abdiazis Ali Ibrahim, talsmaður öryggismálaráðuneytisins, við AFP-fréttastofuna.
Fjöldi fólks var á götum úti þegar sprengjan sprakk enda margir á leið heim úr vinnu.
Enn sem komið er er ekki vitað hverjir bera ábyrgð á árásinni.
Í síðasta mánuði fórust á fjórða tug manns og um tveir tugir særðust þegar tvær bílsprengjur sprungu skammt frá forsetahöllinni og hóteli í Mogadishu. Hryðjuverkasamtökin Shabaab báru ábyrgð á þeirri árás.