Tugþúsundir manns mættu í kröfugöngur víðs vegar í Frakklandi í dag til að mótmæla umbótaáætlunum forseta Frakklands, Emmanuel Macron.
60 stéttarfélög, stjórnmálaöfl og verkalýðsfélög standa að mótmælunum sem eru liður í röð mótmæla og verkfalla opinberra starfsmanna undanfarnar vikur en þeir eru ósáttir við áætlanir Macron um að draga úr opinberum útgjöldum, rifa seglin í fjölda ríkisstarfsmanna og endurskipulagningu á rekstri franska ríkisins.
Heldur fámennara var í mótmælunum í dag en verið hefur upp á síðkastið. Tölum ber þó ekki saman. Lögreglan í París segir að um 21.000 manns hafi komið saman í París og mótmælt en verkalýðsfélagið CGT heldur því fram að 80.000 manns hafi mótmælt í París og 250.000 samtals um allt land.
Macron sagði í heimsókn sinni hjá forseta Rússlands í gær að mótmælin myndu ekki stöðva hann í að ná fram umbótaáætlunum sínum. „Ég mun ekki láta stjórnast af mótmælasamkomum, við höfum gert of mikið af því í fortíðinni,“ sagði Macron.
Mótmælin í dag koma í kjölfar verkfalla opinberra starfsmanna á þriðjudag sem lömuðu atvinnulíf Frakklands þar sem starfsmennirnir tóku þátt í sólarhringsvinnustöðvun járnbrautarstarfsmanna. Öll stéttarfélög opinberra starfsmanna studdu verkfallið en slík samstaða er sjaldséð í Frakklandi. Síðast gerðist það fyrir tíu árum.