Bandarísk kona, sem keyrði jeppabifreið fram af snarbröttum kletti í Big Sur í Kaliforníu-ríki og hrapaði 60 metra niður í fjöru, hefur fundist á lífi, viku eftir að fjölskylda hennar tilkynnti að hennar væri saknað.
Konan heitir Angela Hernandez og er 23 ára gömul, en hún lifði af í fjörunni með því að nota slöngu úr vatnskassa bílsins til þess að ná til vatns úr lækjarsprænu, en bíll hennar maraði í hálfu kafi í sjónum.
Hún var með meðvitund er göngufólk fann hana á föstudag, en var meidd á öxl og virtist hafa fengið heilahristing, samkvæmt upplýsingum frá lögreglu.
According to @MCoSheriff, Angela Hernandez was found about 200 feet down a cliff, her vehicle partially in the water. She was found by two people walking in the area, who called 911. Hernandez was talking and walking. She was taken by ambulance to a helicopter then to a hospital. pic.twitter.com/i0X1kKLnuB
— Tom Wright (@WrightScribe) July 14, 2018
Hernandez sagði lögreglu að hún hefði keyrt út af eftir að hafa sveigt frá dýri á veginum, en hún var á leið frá Portland til Los Angeles að heimsækja systur sína er slysið varð.
Haft er eftir talsmanni lögreglustjórans í Monterey-sýslu að konan sé heppin að vera á lífi, enda fallið hátt.
18:13 - Fréttin hefur verið uppfærð: Í upphaflegri útgáfu fréttar BBC um málið stóð að samkvæmt upplýsingum frá lögreglu hefði konan drukkið vatn úr vatnskassa bílsins til þess að lifa af í fjörunni. Það er ekki rétt og hefur nú verið leiðrétt á vef breska ríkisútvarpsins, en hið rétta er að konan nýtti slöngu úr vatnskassanum til þess að drekka vatn úr lækjarsprænu í fjörunni. Beðist er afsökunar á þessu.