Fjórtán eru særðir, sumir alvarlega, eftir hnífaárás sem átti sér stað um borð í rútu í þýsku borginni Lübeck fyrr í dag. Rútan var á leiðinni til Travemuende, sem er vinsæl strönd í grennd við borgina.
Fjölmiðillinn Lübecker Nachrichten hefur það eftir vitnum að einn farþeganna, íranskur karlmaður á fertugsaldri, hafi skyndilega dregið upp eldhúshníf og byrjað að stinga aðra farþega í rútunni.
Rútubílstjórinn mun þá hafa stöðvað rútuna samstundis og gefið farþegum tækifæri til að flýja. Lögreglubíll var staddur skammt frá og lögregla kom því skjótt á vettvang árásarinnar.
Lögreglan í Slésvík-Holtsetalandi hefur staðfest á Twitter-síðu sinni að árásarmaðurinn sé í haldi og bætti við að enginn hefði látist í árásinni.
Enn er óstaðfest hver maðurinn er eða hvað honum gekk til með árásinni.